Prototeipio, profi a gwella eich syniadau

Cyn adeiladu gwasanaeth, ewch ati i wneud prototeip ohono.  

Gall creu prototeip eich helpu i brofi syniadau yn gyflym, cael adborth gan ddefnyddwyr ac osgoi camgymeriadau costus. Mae prototeipio yn ddefnyddiol pan: 

• nid yw'r gofynion yn glir neu gallant newid 
• rydych yn rhoi cynnig ar syniad neu gysyniad newydd 

Nid oes rhaid i brototeip fod yn berffaith. Mae jyst angen iddo fod yn ddigon da i ddysgu ohono. 

Mae prototeip yn fersiwn cychwynnol o rywbeth rydych chi am ei brofi. Mae'n eich helpu i: 

• profi syniadau gyda defnyddwyr  
• nodi problemau yn gynnar 
• meithrin cyd-ddealltwriaeth yn eich tîm 
• cael gwell adborth gan randdeiliaid 

Dechreuwch yn fach. Mae'n well profi syniad cychwynnol yn gynnar nag aros am rywbeth wedi'i gloywi. 

Gall prototeipiau fod yn syml neu'n fanwl, o frasluniau i ddyluniadau ffug rhyngweithiol.  Yr hyn sy'n bwysig yw dangos y cysyniad er mwyn gallu dysgu ohono. 

Yn dibynnu ar yr hyn rydych chi'n ei brofi, gallai prototeip fod yn: 

• dyluniad, ffrâm wifren neu glicio  
• ffurflen bapur neu lythyr printiedig 
• sgript chwarae rôl neu alwad 
• rhywun yn darllen eich cynnwys ac yn dweud beth fydden nhw'n ei wneud nesaf 

 Nid oes angen i brototeipiau fod yn berffaith, gallant fod mor syml â braslun neu ddyluniad ffug wedi'i fireinio.  

Dechreuwch gyda phrototeip syml i arbed amser yn adeiladu rhywbeth nad yw'n bodloni anghenion defnyddwyr. Gallwch greu prototeip o:   

• gynnyrch digidol neu gorfforol 
• gwasanaeth 
• taith ryngweithiol neu daith 

Er enghraifft, gallech:  

• braslunio fersiwn bapur o ap a'i brofi gyda'ch tîm 
• creu fersiwn ddigidol syml a'i brofi gyda defnyddwyr 
• adeiladu fersiwn graenus gyda brandio a chynnwys wedi'i fireinio 

Cynhyrchion digidol  

Dyma'r math o becynnau cymorth y gallwch chi roi cynnig arnynt: 

• Figma, Sketch neu Adobe XD 
• PowerPoint, Keynote neu Canva ar gyfer prosiect sy'n gofyn am glicio syml 
• Squarespace, Wix, Wordpress neu Marvel ar gyfer profion sy'n seiliedig ar borwr   

Cynhyrchion papur   

Gallai hyn gynnwys pethau fel llythyrau, adroddiadau, llyfrynnau a thaflenni.  

Gallwch ddefnyddio'r canlynol i greu prototeip: 

• Word a Google Docs 
• Canva neu becyn cymorth tebyg 
• meddalwedd cyflwyno

Argraffwch brototeip papur bob amser i weld sut mae'n gweithio mewn bywyd go iawn.   

Gwasanaethau   

Gallwch ddefnyddio'r canlynol i greu prototeip: 

• Sgript neu Fwrdd Stori  
• Modelau neu luniau  
• Chwarae rôl gyda chydweithwyr neu bropiau 

Gallwch hyd yn oed ddefnyddio gwrthrychau fel teganau neu glai i fodelu profiadau. 

Mae profi yn eich helpu i ddeall a yw'ch syniad yn gweithio i ddefnyddwyr.  

Dysgwch am bwysigrwydd profi mewn dylunio sy'n canolbwyntio ar y defnyddiwr. 

Yn dibynnu ar y prototeip, gallwch:

• arsylwi ar bobl yn ei ddefnyddio 
• gofyn iddyn nhw feddwl yn uchel 
• nodi pryd mae rhwystr y codi neu mae'r broses yn ddryslyd 
• gofyn cwestiynau agored fel “Beth yn eich barn chi yw bwriad hyn?” neu “Beth fyddech chi'n ei wneud nesaf?” 
• cynnal y profion yn ddwyieithog 

Mae hyn yn eich helpu i wella cyn buddsoddi amser neu arian. 

Dysgu mwy am ymchwilio i'ch defnyddwyr a phrofi eich gwasanaeth. 

Dyma adnoddau sydd ar gael yn Gymraeg: 

• Defnyddio prototeip i ddechrau sgwrs  
• Datblygu prototeipiau 
• Drafftio’r cynlluniau: sut mae prototeipiau'n helpu i wella'r gwasanaeth gwneud cais am ganiatâd cynllunio yng Nghymru
• Defnyddio profion cysyniad i gefnogi gwasanaethau mamolaeth digidol 

Dyma adnoddau allanol sydd ddim ond ar gael yn Saesneg:

• Prototype kit (GOV.UK)
• Using moderated usability testing (GDS)