Gwella gwasanaethau niwrowahanol i blant yng Nghymru: ein prosiect beta

Dechreuodd ein gwaith drwy wrando ar deuluoedd a gofalwyr am eu profiadau o lywio gwasanaethau niwrowahanol. Yn fwy diweddar, rydym wedi dyfnhau ein dealltwriaeth drwy weithio'n uniongyrchol gyda'r bobl sy'n darparu gofal – clinigwyr, gweinyddwyr ac arweinwyr gweithredol.

Drwy gyfweliadau, ymweliadau safle a gweithdai ar draws llawer o fyrddau iechyd, rydym wedi mapio'r daith gwasanaeth gyfan o'r atgyfeiriad hyd at y diagnosis a'r gefnogaeth ôl-asesu. Mae hyn wedi rhoi darlun clir inni o sut mae'r systemau cymhleth, sy'n canolbwyntio ar bobl, hyn yn gweithio'n ymarferol. 

Gan adeiladu ar ein gwaith darganfod ac alffa, rydym yn parhau â'n partneriaeth â Llywodraeth Cymru, awdurdodau lleol a byrddau iechyd i brofi gwelliannau ymarferol yn y byd go iawn i wasanaethau niwrowhanol i blant. 

Mae ein hymchwil wedi dangos bod y system bresennol dan straen sylweddol. Mae gweithwyr proffesiynol ymroddedig yn gwneud eu gorau o fewn strwythurau tameidiog a gorlwythog. Mae llawer o wasanaethau'n dibynnu ar atebion dros dro, nodiadau ysgrifenedig â llaw, a thaenlenni personol i bontio bylchau a adawyd gan systemau digidol sy'n tanberfformio neu sydd wedi'u hintegreiddio'n wael. Er bod offer digidol yn addawol, rhaid i'w defnydd fod yn feddylgar ac yn canolbwyntio ar y defnyddiwr neu maent mewn perygl o ychwanegu at y baich. Gwelsom fod systemau gorfodol yn aml yn anodd eu defnyddio, gan arwain at fabwysiadu isel a dibyniaeth eang ar ddewisiadau amgen â llaw. 

Rydym yn mabwysiadu dull dwyffordd: 

1. Archwilio offer digidol newydd 

Mae hyn yn cynnwys profi technoleg ysgrifennu AI sydd â photensial sylweddol i:   

• Leihau'r baich gweinyddol 
• Adfer amser clinigol gwerthfawr 
• Gwella gofal parhaol 
• Lleihau straen ar staff 

Mae'r adborth gan fabwysiadwyr cynnar mewn sectorau eraill wedi bod yn gymhellol, ac er bod llawer i'w brofi a'i ddysgu, mae'r manteision posibl yn rhy addawol i'w hanwybyddu. 

2. Gwella systemau presennol 

Nid technoleg ar goll sy'n achosi llawer o heriau ond problemau gyda systemau presennol. Byddwn ni'n edrych ar: 

• Cyfluniad gwell o offer presennol 
• Creu llif gwaith clir 
• Dileu pwyntiau ffrithiant ar gyfer defnyddwyr bob dydd 

Mae popeth a wnawn yn cael ei lywio gan y mapiau taith manwl rydyn ni wedi'u creu, y patrymau rydyn ni wedi'u harsylwi ledled Cymru, ac yn bwysicaf oll, lleisiau'r bobl sy'n gwneud y gwaith bob dydd. Rydym yn nodi pwyntiau cyfyng yn y llwybr lle gall arbrofion wedi'u targedu wneud gwahaniaethau ystyrlon. 

Nid yw hyn yn ymwneud â chreu system newydd sbon sy'n addo trwsio popeth. Mae'n ymwneud â gwneud gwelliannau ymarferol i'r systemau go iawn y mae pobl yn eu defnyddio ac archwilio'n gyfrifol a all technoleg fodern fel deallusrwydd artiffisial gyflawni ei photensial i helpu. 

Rydym wedi ymrwymo i weithio agored drwy gydol y prosiect hwn. Egwyddor allweddol yn Safon Gwasanaeth Digidol Cymru, mae hyn yn golygu y byddwn yn rhannu diweddariadau rheolaidd ar ein cynnydd, ein mewnwelediadau, a sut rydym yn rhoi'r hyn a ddysgwn ar waith i wella gwasanaethau i bawb yng Nghymru.

Cadwch lygad am yr adnoddau rydyn ni'n eu defnyddio yn ystod y prosiect hwn  

Safon Gwasanaeth Digidol ar gyfer Cymru: Egwyddor brofedig ar gyfer dylunio gwasanaethau digidol.