Mae cynllunio effeithlon ac effeithiol yn hanfodol er mwyn i gymunedau ffynnu.
Dros yr wythnosau diwethaf, rydym wedi bod yn cyfarfod â chynghorau ledled Cymru i ddeall yn well sut i wneud y broses gynllunio yn symlach ac yn fwy effeithiol i bawb.
Mae'r ymweliadau hyn yn ein helpu i nodi heriau, rhannu arferion gorau a chydweithio tuag at wella gwasanaethau cynghori cyn ymgeisio ledled Cymru.
Dysgu gan Gyngor Gwynedd
Dechreuodd ein taith gydag ymweliad â Chyngor Gwynedd, lle treuliwyd amser yn dysgu am eu prosesau a'u heriau cyn ymgeisio.
Rhoddodd yr ymweliad hwn gyfle i ni:
ddeall yn well y daith gynllunio o'u safbwynt nhw
nodi'r heriau sy'n wynebu'r timau cynllunio a'r ymgeiswyr yn rheolaidd
archwilio cyfleoedd i wella systemau ac arweiniad
Rydym yn hynod ddiolchgar i Gyngor Gwynedd am fod yn agored ac am eu cydweithrediad. Mae wedi bod yn bleser dysgu o'u profiadau, ac rydym yn gyffrous i weithio gyda'n gilydd ar y camau nesaf i greu system fwy effeithlon ar gyfer deiliaid tai a gweithwyr cynllunio proffesiynol.
Partneriaeth gyda Chyngor Bro Morgannwg
Nesaf, fe wnaethom ymweld â Chyngor Bro Morgannwg, partner arall yn y daith hon.
Yn ystod ein trafodaethau gyda staff a rheolwyr cynllunio, roeddem yn gallu:
cael mewnwelediad i'w proses cynghori cyn ymgeisio
dysgu am yr ymholiadau mwyaf cyffredin a dderbynir
archwilio ffyrdd o symleiddio'r broses ar gyfer ymgeiswyr a staff y cyngor
Amlygodd y sgyrsiau hyn ymrwymiad eu tîm cynllunio i ddarparu cefnogaeth ragorol wrth lywio heriau system gymhleth.
Archwilio prosesau cyn ymgeisio gyda Chyngor Caerdydd
Buom hefyd yn siarad â Chyngor Caerdydd, lle gwnaethom ymchwilio'n ddyfnach i'r ffordd y mae eu tîm cynllunio yn ymdrin â cheisiadau cyn ymgeisio.
Yn ystod yr ymweliad, gwnaethom archwilio:
sut mae ceisiadau'n cael eu cofrestru, eu dilysu a'u prosesu
y cwestiynau cyffredin y maent yn eu derbyn
yr heriau sy'n eu hwynebu wrth ddarparu cyngor amserol
Roedd clywed am eu profiadau yn ein helpu i weld y broses gynllunio o safbwyntiau technegol a dynol. Roedd yn amlwg faint o ymdrech a wneir i gefnogi ymgeiswyr, ac rydym yn ddiolchgar am eu mewnwelediadau a'u didwylledd.
Beth sydd nesaf?
Mae'r ymweliadau hyn wedi rhoi darlun cliriach i ni o'r daith Cynllunio yng Nghymru. Trwy weithio gyda chynghorau a gwrando ar eu profiadau, rydym yn gosod y sylfaen ar gyfer system sy'n haws ei llywio i ymgeiswyr ac yn fwy effeithlon ar gyfer timau cynllunio.
Cymryd rhan
Rydym yn edrych ymlaen at barhau â'r sgyrsiau hyn a rhannu diweddariadau ar y cynnydd rydym yn ei wneud. I gael gwybod mwy am yr hyn rydym yn ei wneud ac i dderbyn diweddariadau penodol ar y prosiect, ewch i'n tudalen prosiect.
Rydym hefyd yn awyddus i siarad ag unigolion sydd naill ai wedi gwneud cais am ganiatâd cynllunio neu wedi defnyddio'r gwasanaeth cynghori cyn ymgeisio yng Nghymru dros y flwyddyn ddiwethaf.
Os hoffech siarad â'n tîm ymchwil defnyddwyr, llenwch ein ffurflen gofrestru os gwelwch yn dda.
Os cewch eich dewis i gymryd rhan, byddwch yn derbyn taleb siopa o £20 fel arwydd o'n gwerthfawrogiad.
Gyda'n gilydd, gallwn adeiladu proses gynllunio sy'n cefnogi ein cymunedau, symleiddio'r daith i ddeiliaid tai ac yn helpu gweithwyr proffesiynol i ddarparu'r gwasanaeth gorau posibl.
