Mewn blogiau blaenorol, rydym wedi rhannu ein gwaith yn archwilio sut y dylai asesiadau gwasanaeth weithio yng Nghymru. Wrth wraidd yr alpha hwn mae dull arbrofol sy'n dibynnu ar ymchwil defnyddwyr i'n helpu i wneud penderfyniadau sy'n seiliedig ar dystiolaeth ynghylch sut i symud ymlaen. 

Yr hyn rydyn ni wedi bod yn gweithio arno 

Y mis hwn, rydym wedi bod yn gweithio ar arbrawf 2 yn seiliedig ar ein gwaith ar y rhagdybiaeth hon: 

Credwn y bydd darparu asesiadau wedi'u teilwra ar gyfer cyfnodau cyflawni gyda chanlyniadau clir 'wedi'u bodloni/heb eu bodloni' yn ysgogi newidiadau sy'n cyd-fynd â Safon Gwasanaeth Digidol Cymru. 

Beth wnaethon ni ei gynllunio 

Er mwyn profi ein rhagdybiaeth, fe wnaethom ddylunio taith defnyddiwr a gyflwynodd y cysyniad o asesiad gwasanaeth dau gam ac integreiddio rhai o'r mewnwelediadau o'n rownd flaenorol o ymchwil. Yna fe wnaethom ddylunio tri phrototeip Figma a ddaeth ag elfennau o'r daith yn fyw: rhestr wirio, adroddiad canlyniadau a thudalen we sy'n esbonio'r asesiad gwasanaeth dau gam. Dyluniwyd y prototeipiau fel y gallai ein cyfranogwyr ymchwil gael gwell dealltwriaeth o'r cysyniad. 

Yr hyn a ddysgon ni 

Ar ôl ein cyfweliadau ymchwil cyntaf, dechreuon ni gredu nad oedd ein rhagdybiaeth yn gywir. Roedd cyfranogwyr yn defnyddio'r prototeipiau yn ôl y disgwyl ond yn siarad am eu defnyddio mewn teithiau defnyddwyr nad oeddent yn cyfateb i'r un roedden ni wedi creu. 

Erbyn i ni gwblhau pob un o'r naw cyfweliad roedd yn amlwg bod ein rhagdybiaeth yn hollol anghywir. 

Nid oedd ein rhagdybiaeth wedi ystyried: 

  • pa mor wahanol mae timau yn gweithio ledled Cymru 
  • yr amrywiaeth yn y ffordd y mae sefydliadau yn gweld pwysigrwydd y safonau gwasanaeth 
  • yr awydd gan rai unigolion / timau i wneud gwaith da 

Yr hyn sy’n digwydd nesaf 

Fe wnaeth ein dull sy'n seiliedig ar ddamcaniaeth ein helpu i brofi gwasanaeth sgerbwd tra ei fod yn dal i fod yn gysyniad. Er nad oedd yn y cyfeiriad cywir, fe wnaeth ein helpu i ddysgu. Roeddem yn gallu: 

  • cael mwy o eglurder ar yr hyn sydd ei angen ar ddefnyddwyr o'r broses (trwy ddweud wrthym beth na ddylai fod) 
  • deall y cymhlethdod a allai effeithio ar lwyddiant asesiadau gwasanaeth 
  • cael mwy o hyder ar sut i symud ymlaen

Byddem yn argymell cymryd dull seiliedig ar arbrawf / rhagdybiaeth wrth feddwl am ddatblygu gwasanaeth. Roedd gweithio yn agored (egwyddor allweddol o fewn y Safon Gwasanaeth Digidol) yn caniatáu inni rannu'n agored nad oedd yr hyn yr oeddem wedi’i ystyred ar y  dechrau yn gywir. Yn ein blog nesaf, byddwn yn ymdrin â'n hargymhellion terfynol ar sut y gallai asesu gwasanaeth edrych fel yn y dyfodol.