Trosolwg
Mae ymchwil defnyddwyr yn allweddol er mwyn dylunio a darparu gwasanaethau cost-effeithiol ac effeithlon.
Mae'n eich helpu i ddysgu am eich defnyddwyr, a deall eu:
- hymddygiad
- anghenion
- cymhellion
- profiadau a'u dealltwriaeth o'r byd
Fel hyn rydych chi'n darganfod pethau nad oeddech chi'n eu gwybod, yn datblygu empathi â'ch defnyddwyr, ac yn adeiladu'r peth iawn yn y ffordd sy'n gweithio i'ch defnyddwyr.
Beth yw ymchwil defnyddwyr
Mae ymchwil defnyddwyr yn ddull sy'n seiliedig ar dystiolaeth o nodi a phrofi eich rhagdybiaethau a dysgu am eich defnyddwyr.
Mae’n mynd tu hwnt i anfon holiaduron neu ofyn i bobl beth maen nhw ei eisiau. Mae'n ymwneud ag arsylwi pobl yn defnyddio gwasanaethau, profi dyluniadau gyda nhw, ac archwilio pam mae pethau'n gweithio neu ddim yn gweithio.
Mae angen i chi ddealll:
- pwy yw eich defnyddwyr
- beth maen nhw'n ceisio chwilio amdano, ceisio ei wneud neu ei gael, a pham
- sut y maen nhw’n ceisio gwneud pethau nawr
- sut mae eu profiadau bywyd a’u ffordd o edrych ar y byd yn dylanwadu ar yr hyn y maen nhw'n ei wneud
- sut maen nhw’n defnyddio a pha brofiad sydd ganddynt o wasanaethau cyfredol
Gall hyn eich helpu i greu cynhyrchion a gwasanaethau sy'n gweithio i’ch defnyddwyr.
Manteision ymchwil defnyddwyr
Gall darparu gwasanaeth heb ddeall eich defnyddwyr a'u hanghenion greu problemau difrifol ym mywyd eich defnyddwyr.
Er enghraifft, methu â chael cymorth ariannol, methu apwyntiad gofal iechyd pwysig neu wneud cais am drwydded.
Gall hefyd effeithio ar eich busnes a'ch sefydliad drwy:
- gynyddu costau ac aneffeithlonrwydd
- defnyddio adnoddau i greu'r peth anghywir
- difrodi eich enw da
- achosi i bolisi fethu â chyflawni ei nodau
Gan ddefnyddio tystiolaeth o ymchwil defnyddwyr i ddylunio, adeiladu a darparu eich gwasanaeth, byddwch chi'n creu rhywbeth sy'n:
- gweithio i'ch defnyddiwr
- datrys y broblem gywir
- datrys eich problem mewn modd effeithiol ac effeithlon