Mae hyfforddiant ar gyfer swyddogion gweithredol ac arbenigwyr digidol GIG Cymru yn dangos sut mae dylunio sy’n canolbwyntio ar y defnyddiwr yn arwain at wasanaethau mwy effeithlon ac effeithiol
16 Chwefror 2022
Rydym yn gwybod na fydd gweddnewid gofal iechyd yn ddigidol yng Nghymru yn llwyddo heb gyfraniad a chefnogaeth defnyddwyr rheng flaen – cleifion a chlinigwyr. Ond mae angen i swyddogion gweithredol sy’n gwneud penderfyniadau ac arbenigwyr digidol gefnogi’r broses hefyd, a dyma’r rhanddeiliaid sydd gan y Ganolfan Gwasanaethau Cyhoeddus Digidol (CDPS) mewn golwg ar gyfer ei hyfforddiant diweddaraf.
Dangosodd y pandemig ba mor allweddol yw gwasanaethau digidol ym maes iechyd, ac mae Llywodraeth Cymru wedi amlygu dylunio gwasanaethau sy’n canolbwyntio ar y defnyddiwr fel blaenoriaeth benodol i’w datblygu. Gyda hynny mewn golwg, mae CDPS yn cynnig dau gwrs newydd o fis Chwefror eleni: dosbarth meistr dylunio sy’n canolbwyntio ar y defnyddiwr, “Canlyniadau iechyd gwell trwy wasanaethau sy’n canolbwyntio ar y claf”, ar gyfer aelodau bwrdd iechyd ac uwch benderfynwyr eraill yn y sector iechyd yng Nghymru; a Chyflwyniad i ymchwil defnyddwyr (Archebwch nawr), ar gyfer arbenigwyr digidol ledled GIG Cymru.
Mae’r dosbarth meistr “Canlyniadau iechyd gwell trwy wasanaethau sy’n canolbwyntio ar y claf”, a gynhelir gan Lou Downe, cyn Gyfarwyddwr Dylunio ar gyfer Llywodraeth y Deyrnas Unedig a sylfaenydd yr Ysgol Gwasanaethau Da, yn ceisio rhoi dealltwriaeth sylfaenol dda i arweinwyr iechyd y cyhoedd yng Nghymru o sut i greu gwasanaethau o amgylch anghenion y bobl sy’n eu defnyddio (clinigwyr a chleifion, yn yr achos hwn). Mae hefyd yn ceisio annog penderfynwyr i hyrwyddo’r dull hwn – sy’n ddull gwahanol iawn i’r hen ffordd o ddylunio gwasanaethau a oedd yn adlewyrchu gofynion sefydliadol ac yn gobeithio y byddai’n addas i bobl yn y pen draw.
Mae ein cwrs cyflwyniadol i ymchwil defnyddwyr, a gynhelir gan yr asiantaeth dylunio gwasanaethau o Gymru Perago a’r ymgynghoriaeth Ystwyth Basis, wedi’i fwriadu ar gyfer arbenigwyr digidol ledled GIG Cymru: y bobl sy’n creu’r gwasanaethau ar-lein, er enghraifft, sy’n cadw system iechyd Cymru i fynd nawr. Bydd yr arbenigwyr hyn, sy’n cyflawni swyddogaethau allweddol mewn sector sy’n cael ei sbarduno fwyfwy gan dechnoleg, yn elwa o’r cwrs a fydd yn rhoi gwybodaeth sylfaenol am sut i amlygu anghenion defnyddwyr trwy gyfweliadau a gwaith ymchwil arall. Byddant hefyd yn deall sut mae ymchwil defnyddwyr yn wahanol i ymgysylltu clinigol (deall pryderon a nodau staff clinigol, ac fel arall) y gallent fod yn ei wneud nawr.
Isod, mae’r trefnwyr yn rhoi mwy o fanylion am y cyrsiau maen nhw’n eu cynnal.
Nod cyrsiau newydd CDPS yw dangos sut y gall dylunio sy’n canolbwyntio ar y defnyddiwr arwain at well gwasanaethau iechyd yng Nghymru, gyda chleifion yn ganolog iddynt.
Canlyniadau iechyd gwell trwy wasanaethau sy’n canolbwyntio ar y claf
Lou Downe: Mewn byd lle mae adnoddau’n gyfyngedig, mae’n bwysicach nag erioed ein bod yn cynyddu effaith yr ymyriadau iechyd a wnawn i’r eithaf. Ffordd syml o wneud hynny yw trwy sicrhau nad yw ein bwriadau gorau yn mynd yn wastraff trwy brofiadau a ddyluniwyd yn wael i gleifion. Rydym yn gwybod bod biliynau’n cael eu gwastraffu oherwydd colli apwyntiadau, oherwydd nad yw cleifion yn gallu dilyn canllawiau neu oherwydd prosesau aneffeithlon nad ydynt yn helpu ein defnyddwyr i gyrraedd eu nod. Fodd bynnag, gall yr ateb ymddangos yn ddiangen o gymhleth yn aml.
Bydd y cwrs 2 awr hwn yn helpu arweinwyr gofal iechyd i ddeall pwysigrwydd dylunio gwasanaethau sy’n canolbwyntio ar gleifion a staff ac effaith hynny ar gleifion, staff a’u sefydliad. Bydd yn dangos sut i ymestyn effeithlonrwydd ac effeithiolrwydd gwasanaethau trwy wella elfennau anghlinigol teithiau gofal iechyd yn syml ac yn rhwydd.
Cyflwyniad i ymchwil defnyddwyr
Perago a Basis: Mae gwreiddiau Perago ym maes darparu gwasanaethau cyhoeddus yng Nghymru. Rydym yn cynorthwyo sefydliadau yng Nghymru i ddarparu gwasanaethau cyhoeddus gwell, gan gyd-fynd â’r Ddeddf Llesiant Cenedlaethau’r Dyfodol. Mae Basis yn helpu gwasanaethau cyhoeddus i fynd i’r afael â phroblemau cymhleth trwy ymgynghori a hyfforddi; fe’i henwyd yn un o’r ymgyngoriaethau rheoli gorau yn y Deyrnas Unedig am dair blynedd yn olynol.
Bydd eich cwrs 3 awr yn cael ei gyflwyno gan ymarferwyr sy’n brofiadol ym maes ymchwil defnyddwyr a dylunio sy’n canolbwyntio ar y defnyddiwr. Bydd yn ymdrin â phrofiad ymarferol o ddarparu gwasanaethau ar gyfer y cyhoedd yng Nghymru a’r Deyrnas Unedig ehangach, gan gynnwys ym maes iechyd.
I ymuno â’r rhestr aros ar gyfer y cyrsiau hyn neu gael gwybod mwy, anfonwch neges e-bost at learning@digitalpublicservices.gov.wales